BLOG BYW: Ymateb bro Aber i helynt y coronafeirws

Ysgol Gyfun Gymunedol Penweddig wedi cau.

Mae Golwg360 ar ddeall fod Ysgol Gyfun Gymunedol Penweddig ar gau heddiw oherwydd y coronafeirws.

Cadarnhaodd yr Ysgol wrth Golwg360 fod y dewis i gau’r ysgol wedi cael ei wneud er mwyn glanhau’r adeilad heddiw fel mesur diogelwch.

Darllenwch fwy am hyn ar Golwg360

Gwasanaeth Dosbarthu gan Siopau Lleol Aberystwyth

Mae’r Cigydd Rob Rattray wedi cyhoeddi eu bod nhw’n cyd weithio a Marchnad Bysgod Jonah’s yn nhref Aberystwyth er mwyn darparu gwasanaeth dosbarthu bwyd i’r henoed a phobol sydd yn bryderus ynglŷn a gadael eu cartref.

Ydych chi’n cynnig gwasanaeth tebyg? Defnyddiwch y Blog Byw yma i rannu â cwsmeriaid.

Bydd Canolfan y Celfyddydau Aberystwyth ar gau i ymwelwyr o 6pm heddiw (Dydd Mawrth 17 Mawrth) hyd yr hysbysir yn wahanol. Diogelwch ein cynulleidfaoedd a’n staff yw ein prif flaenoriaeth wrth wneud y penderfyniad hwn. Byddwn yn parhau i ddilyn cyfarwyddyd ynglyn â phryd y byddwn yn ail ddechrau ein rhaglen.

CAPEL HOREB, Penrhyn-coch

Yn unol â chyfarwyddyd diweddaraf y Llywodraeth ni chynhelir oedfaon na Chlwb Sul am gyfnod amhenodol. Os oes angen cymorth ymarferol ar unrhyw un rhowch wybod i’r Swyddogion. Cymerwch ofal!

Eisteddfod Genedlaethol Ceredigion yn monitro’r sefyllfa

“Rydym yn monitro’r sefyllfa’n barhaus ac mewn cysylltiad dyddiol gyda Llywodraeth Cymru a’n partneriaid allweddol.

“Ar hyn o bryd, ein gobaith yw cynnal Eisteddfod Genedlaethol Ceredigion yn Nhregaron o 1-8 Awst, ac mae’r staff yn parhau i weithio’n galed er mwyn gwireddu hyn.”

Dim cynlluniau i gau Coleg Ceredigion ar hyn o bryd

Ar hyn o bryd, nid oes unrhyw gynlluniau i gau unrhyw un o gampysau’r Coleg Ceredigion.

Fodd bynnag, mae uwch Dîm Arweinyddiaeth y Coleg yn cynllunio ar gyfer cau.

Mewn datganiad dywedodd y Coleg:

“Diogelwch ein dysgwyr, ein gweithwyr, a’n hymwelwyr yw ein blaenoriaeth.

“Ar hyn o bryd, os ydych yn iach, dylech fynychu’r holl wersi ar yr amserlen, a lleoliadau, oni bai bod tiwtor eich cwrs neu eich tiwtor personol yn rhoi gwybod fel arall i chi.

“Byddem yn annog yn gryf eich bod yn parhau i gynllunio a pharatoi ar gyfer eich arholiadau a’ch asesiadau sy’n agosáu.”

Darllenwch y datganiad llawn ar wefan Coleg Ceredigion.

EISTEDDFOD GADEIRIOL PENRHYN-COCH 2020

Yn sgîl y pryderon ynglŷn â COVID-19 penderfynwyd canslo Eisteddfod eleni oedd i’w chynnal ddydd Gwener 24 a dydd Sadwrn 25 o Ebrill 2020. Byddwn yn cadw y cynnyrch llenyddol gyrhaeddodd eisoes gan obeithio gallu trefnu Eisteddfod 2021 pan ddaw cyfle.

Dim dirwyon llyfrgell am 3 mis

Mae Llyfrgell Ceredigion wedi cyhoeddi na fydd neb yn wynebu dirwyon am ddychwelyd llyfrau yn hwyr dros y 3 mis nesaf.

Mewn datganiad dywedodd Llyfrgell Ceredigion:

“Dydy ni ddim am i bobol boeni am ddychwelyd llyfrau yn hwyr dros y cyfnod hwn, felly ar gyfer y 3 mis nesaf ni fyddwn yn rhoi dirwy i neb. Os ydych angen adnewyddu eich llyfrau neu edrych ar fenthyg e-lyfrau neu e-lyfrau siarad ffoniwch un o’n llyfrgelloedd am fwy o wybodaeth.”

Am ragor o wybodaeth cliciwch yma

Cau’r Llyfrgell Genedlaethol i’r Cyhoedd

Darllenwch mwy am hyn ar Golwg360

Diweddariad Coronafeirws gan Ben Lake