gan
Ohebydd Golwg360
Ffermwr amlwg yn gwadu honiadau pennaeth O’r Mynydd i’r Môr
Mae ffermwr lleol amlwg wedi gwrthod honiad pennaeth y prosiect amgylcheddol O’r Mynydd i’r Môr nad cynllun ailwylltio yw e.
“Maen nhw’n dweud un peth wrth un gynulleidfa, a rhywbeth arall wrth y llall,” meddai Dafydd Morris-Jones o Ysbyty Cynfyn, ger Ponterwyd, un o’r ffermwyr sy’n gwrthwynebu’r prosiect.
Roedd yn cyhuddo trefnwyr y prosiect o esgus “cyfaddawdu” ar ôl i un o’r prif bartneriaid lleol droi cefn arno – doedd dim wedi newid, meddai.
‘Ffermwyr yn camddeall’
Roedd Dafydd Morris-Jones yn ymateb i gyfweliad gan Melanie Newton ar y BBC pan ddywedodd fod ffermwyr lleol yn “camddeall” y cynllun.
Fe ddaeth y sylwadau yn sgil penderfyniad Bwrdd Rheolwyr Ecodyfi i adael y cynllun gan ddweud nad oedd digon o feddwl am yr effaith ar gymunedau lleol.
Mae arwyddion protest wedi cael eu codi yn yr ardal hefyd yn gwrthwynebu.
Dim cyfaddawd
“Ers y cychwyn, maen nhw wedi glynu wrth yr un cynllun o hyd, heb newid dim,” meddai Dafydd Morris-Jones. “Does dim cyfaddawd mewn gwirionedd.
“Maen nhw’n dweud nad ydyn nhw am ailwylltio, ond eu prif bartner yw Dad-ddofi Prydain [Rewilding Britain], ac mae hwythau’n nodi ar eu gwefan pa mor ganolog yw prosiect O’r Mynydd i’r Môr i’w gwaith a’u gweledigaeth nhw.
Roedd yn cyfeirio hefyd at gyfweliad gyda Chyfarwyddwr Dad-ddofi Prydain, Alistair Driver, yn y cylchgrawn Inside Ecology, lle mae’n sôn am lenwi ffosydd, ailgysylltu gorlifdiroedd a phlannu coed a denu eco-dwristiaid.
Yn ôl Dafydd Morris-Jones, roedd hynny’n dangos y byddai eco-dwristiaeth yn dibynnu ar gael gwared ar dir amaethyddol yn barhaol.
Mae golwg360 wedi cysylltu â phrosiect O’r Mynydd i’r Môr am ymateb i’w sylwadau.
Beth ddywedodd Melanie Newton
“Nage prosiect ailwylltio yw hwn – mae pob math o bethau eraill yma,” meddai Melanie Newton wrth BBC Cymru. “Mae’r gair ailwylltio yn anodd iawn ac yn golygu lot o wahanol bethau i wahanol bobol.
“I ni fan hyn sicrhau’r amgylchedd yw e i ni ac nid meddwl am ailwylltio a dod ag anifeiliaid yn ôl. Dyw hynny ddim yn bwysig i ni a dyw hynny ddim yn mynd i ddigwydd.”