Cyngerdd yn Amgueddfa Ceredigion i godi arian ar gyfer Wcrain

Nos Wener diwethaf, 15 Tachwedd, fe wnaeth Cerddorfa Siambr Llambed berfformio Pumawd Llinynnol Schubert yn C Fwyaf i godi arian ar gyfer Cerddorfa Symffoni Zaporozhye, Wcrain. Chwaraeodd y gerddorfa i dŷ llawn a oedd wrth eu boddau gyda’r perfformiad.

Yn ddiweddar bu’r gerddorfa’n ffodus i gael Dr David Russel Hume yn arweinydd gwadd. Tan yn ddiweddar  bu David yn Gyfarwyddwr Cerdd ym Mhrifysgol Aberystwyth, ac mae e wedi bod yn arweinydd gwadd Cerddorfa Symffoni Zaporozhye ers nifer o flynyddoedd. Mae Zaporozhye ar gyrion y parthau rhyfel, ac mae’r Gerddorfa leol yn parhau i ddarparu cyngherddau wythnosol yng nghanol peryglon brawychus rhyfel Wcrain. Mae David wedi ysbrydoli Cerddorfa Siambr Llambed i gyflwyno cyfres o gyngherddau i godi arian ar gyfer aelodau’r gerddorfa honno yn eu cyfyngder.