gan
Mererid
Wyn-a-Efa
Yn wreiddiol o fferm Tynrhelyg, Llanfarian, Wyn Mason yw awdur Gwlad yr Asyn, nofel graffeg a gyhoeddwyd gan Wasg Carreg Gwalch, gyda darluniau gan Efa Blosse Mason, ei ferch. Bellach yn byw yn Nghaerdydd, cynhaliodd y ddau noson yn ddiweddar yn Llyfrgell Aberystwyth yn esbonio beth oedd yr ysbrydoliaeth tu ôl i’r llyfr.
Pleser hefyd yw gweld fod gwaith y darlunydd lleol, Valériane Leblond hefyd ar y restr gyda Enwogion o Fri: Nye – Bywyd Angerddol Aneurin Bevan.
Un arall yn wreiddiol o Geredigion ac a anwyd yn Aberystwyth yw Alun Davies, awdur Manawydan Jones: Y Pair Dadeni, ond bellach hefyd yn byw yn Nghaerdydd.
Ar nos Iau, 23ain o Fawrth 2023, cyhoeddwyd Rhestr Fer Gymraeg ar gyfer Gwobrau Tir na n-Og 2023, oedd yn cynnwys Gwlad yr Asyn.
Beirniaid y gwobrau Cymraeg eleni oedd Morgan Dafydd, Sara Yassine, Francesca Sciarrillo, Sioned Dafydd a Siôn Edwards.
Dyma’r rhestr fer am lyfrau ar gyfer plant oedran cynradd
Dros y Môr a’r Mynyddoedd, awduron amrywiol (Gwasg Carreg Gwalch)
Casgliad prydferth o straeon Celtaidd rhyngwladol. Er bod pob stori’n unigryw ac yn wahanol, mae un peth yn gyffredin rhyngddynt – y merched cryf a phenderfynol sy’n arwain pob stori.
Dwi Eisiau Bod yn Ddeinosor, Huw Aaron a Luned Aaron (Atebol)
Llyfr modern, doniol a lliwgar sy’n llawn direidi ond yn trafod neges bwysig ar yr un pryd – rwyt ti’n ddigon da fel ag yr wyt ti.
Enwogion o Fri: Nye – Bywyd Angerddol Aneurin Bevan, Manon Steffan Ros, darluniwyd gan Valériane Leblond (Llyfrau Broga)
Cyfuniad o air a llun yn dod at ei gilydd i ddweud hanes un bachgen swil o dde Cymru, a lwyddodd i helpu miliynau o bobl drwy ei waith yn sefydlu un o’n trysorau cenedlaethol.
Rhestr Fer Uwchradd
Gwlad yr Asyn, Wyn Mason, darluniwyd gan Efa Blosse Mason (Gwasg Carreg Gwalch)
Nofel graffeg anghyffredin a ffraeth iawn sy’n seiliedig ar ddrama lwyfan. Stori am asyn sydd wedi hen arfer bod o gwmpas pobol, ond erbyn y diwedd daw i gwestiynu ei hunaniaeth ei hun!
Manawydan Jones: Y Pair Dadeni, Alun Davies (Y Lolfa)
Antur ffantasïol llawn dirgelwch, sy’n croesi’r ffin rhwng y byd go iawn a’r byd hudol. Dehongliad modern a ffres o hen chwedlau’r Mabinogi sy’n eu cyflwyno i genhedlaeth newydd o ddarllenwyr.
Powell, Manon Steffan Ros (Y Lolfa)
Nofel deimladwy ac amserol iawn sy’n taflu goleuni ar rôl Cymru yn y diwydiant caethwasiaeth.
Dywedodd Morgan Dafydd, Cadeirydd y Panel Cymraeg, bod y safon yn uchel iawn eleni.
Er bod yr argyfwng costau byw yn brathu, o edrych ar yr arlwy eleni gallwn weld fod y diwydiant llyfrau yn dal ei dir a bod creadigrwydd yn ffynnu.
Eleni, gwelsom gymysgedd o awduron newydd ynghyd â rhai cyfarwydd ym maes llyfrau i blant.
Yn fy nhrydedd flwyddyn ar y panel, gallaf ddweud â sicrwydd bod y safon yn uchel iawn eleni – yn wir, mae’n parhau i godi bob blwyddyn.
Wrth longyfarch y sawl sydd ar y rhestrau byrion, dywedodd Helgard Krause, Prif Weithredwr Cyngor Llyfrau, ei bod hi’n
“galonogol iawn gweld llyfrau gwreiddiol Cymraeg mewn cymaint o wahanol fformatau i apelio at ddarllenwyr ifanc”.
“Rwy’n edrych ymlaen yn fawr at weld pa lyfrau fydd yn fuddugol eleni.”