Cwmnïaeth

Yn Neuadd Goffa Penparcau ar ddechrau blwyddyn newydd daeth cyfle i’r ffoaduriaid hynny sy’n byw yn ardal Aberystwyth ddod at ei gilydd. Yn blant, pobl ifanc, rhieni, dwy nain a dwy hen chwaer o Syria, Afghanistan a’r Wcrain.

Daeth y gwahoddiad i’r parti at Aberaid trwy gangen Penparcau o’r W.I. a chriw gweithgar wedi paratoi’n wych ar gyfer y pnawn hwyliog oeddynt. Cafwyd croeso cynnes gan aelodau o Benllwyn a Felin-fach yn ogystal â’r merched lleol. Roedd y Neuadd wedi ei haddurno’r, cerddoriaeth pwrpasol er mwyn chwarae pasio’r parsel a gemau tebyg. Y plant bach wrth eu boddau yn ennill bag o losin a phlant hŷn yn cael hwyl yn dawnsio ar gyfer gêm ‘statues’. Roedd hyd yn oed cornel wedi eu neilltuo i’r babanod yn llawn teganau addas a balŵns lond y lle. Roedd bwrdd ar gyfer dysgu’r grefft o wneud macramé, a byrddau wedi ‘u gosod mewn mannau i bobl gael dod at eu gilydd am sgwrs dros baned, cacen neu blatiad anferth o fwydydd amrywiol.Roedd pawb wedi dod a dysgl o fwyd, sawrus neu felys a gwelwyd byrddau gorlawn o wahanol fwydydd, gwledd ddiwylliannol yn wir, newid derbyniol o dwrci, stwffin a thatw rhost.

Dylai Aber a Cheredigion fod yn falch iawn eu bod yn rhoi noddfa hael i drigolion y gwledydd yma.