gan
Ohebydd Golwg360
Mae Taron Egerton, sydd yn dod yn wreiddiol o Aberystwyth, wedi ennill gwobr am yr actor gorau mewn comedi/sioe gerdd yn y Golden Globes am ei bortread o Syr Elton John yn y ffilm Rocketman.
Er iddo gael ei eni ym Mhenbedw, symudodd ei deulu i Fôn pan roedd yn blentyn, ac yna i Aberystwyth pan oedd yn 12 oed. Hyd heddiw mae’r seren Hollywood, sy’n un o gynddisgyblion Ysgol Penglais, yn falch iawn o’i gysylltiad â’r dref mae’n ei galw’n gartref.
Dylanwad Canolfan y Celfyddydau
Roedd Canolfan y Celfyddydau yn Aberystwyth yn ganolbwynt i fywyd yr actor pan roedd yn ifanc.
Mewn cyfweliad â Bafta Cymru dywedodd Taron Egerton fod y ganolfan wedi cael dylanwad mawr ar ei yrfa.
“Pan oeddwn tua 14 neu 15 ymunais â Theatr Ieuenctid Canolfan y Celfyddydau Aberystwyth, a newidiodd fy mywyd yn llwyr.”
Yn 2005 aeth ymlaen i chwarae rhan yr Artful Dodger yn sioe lwyfan ‘Oliver!’ oedd yn cael ei pherfformio yn y Ganolfan.
Dywedodd llefarydd ar ran y ganolfan eu bod nhw “wrth eu bodd o glywed y newyddion bod Taron wedi dod yn fuddugol” a’i fod yn “llwyr haeddiannol” o’r wobr.
Testun balchder i Aberystwyth a Cheredigion
Disgrifiwyd llwyddant Taron Egerton gan Faer y Dref, Mari Turner, fel “testun balchder mawr i dref Aberystwyth”.
Aeth ymlaen i ddweud, “mae’n braf gweld dyn ifanc talentog yn llysgennad mor gadarnhaol i’n cymuned. Mae’n profi hefyd mor bwysig yw sicrhau cyfleoedd creadigol i bobl ifanc y dref er mwyn datblygu’u hyder a’u talentau unigryw.“
Ar ei chyfri Twitter dywedodd yr Aelod Cynulliad dros Geredigion, Elin Jones fod Ceredigion yn browd iawn o’i lwyddiant.
Ni’n prowd iawn ohonot ti @TaronEgerton
Ceredigion and Wales is rightly proud of Taron’s great achievement at the Golden Globes.
Da iawn! ??? pic.twitter.com/UcYSZzbvH5— Elin Jones (@ElinCeredigion) January 6, 2020
“Mae hwn i ti, mam”
Wrth dderbyn ei wobr yn California dywedodd Taron Egerton, “Mae’r rôl yma wedi newid fy mywyd, hwn yw profiad gorau fy mywyd, mae wedi bod yn anhygoel.”
Aeth ymlaen i ddiolch i Elton John: “Diolch am y gerddoriaeth, am fyw bywyd anghyffredin a diolch am fod yn ffrind i mi.”
Gorffennodd ei araith trwy ddweud bod y wobr yn deyrnged i’w fam, a oedd yn y seremoni’n gwylio.
Congratulations to Taron Egerton – Best Performance by an Actor in a Motion Picture – Musical or Comedy – Rocketman (@rocketmanmovie). – #GoldenGlobes pic.twitter.com/0MC94mgVDH
— Golden Globe Awards (@goldenglobes) January 6, 2020