gan
Deian Creunant
Cafwyd ail ddiwrnod llwyddiannus tu hwnt yn ffotomarathon Pasg FfotoAber gyda dros 300 o bobl y tro hwn yn cymryd rhan yn y digwyddiad unigryw.
Thema’r ail ddiwrnod oedd Melyn ac mae’n bosib gweld yr amryw geisiadau drwy ymweld â sianeli Twitter, Facebook ac Instagram FfotoAber a chwilio am yr hashnod #ffotomarathonpasg.
Cafodd Aled Jenkins, y beirniad, noson brysur arall gyda’r safon yn parhau yn aruthrol o uchel.
Roedd am grybwyll yn arbennig a rhoi clod i luniau John Gorman, Ffion Davies a Rhodri Edwards.
Ond yr enillydd am y dydd Sadwrn oedd Harriet McDevitt Smith gyda’r llun isod gan ei fod yn dangos defnydd da o olau.
Bydd yn derbyn taleb ar gyfer siop flodau no 21 yn Aberystwyth..
Llongyfarchiadau iddi hi ac i bawb a gymerodd ran.
Y thema ar gyfer heddiw (Sul) yw Rhif – y wybodaeth lawn ar dudalennau Facebook, Twitter ac Instagram FfotoAber.