gan
Ohebydd Golwg360
Mae golwg360 wedi gweld e-bost gan Brifysgol Aberystwyth sydd yn argymell y dylai aelodau staff baratoi ar gyfer gweithio o adref oherwydd amhariadau posib oherwydd coronavirus.
Mae’r e-bost, a gafodd ei gyrru i staff y brifysgol yr wythnos yma, yn nodi y dylai pob aelod o staff fedru defnyddio rhwydwaith y Brifysgol a’r systemau cysylltiedig pe bai angen gweithio o bell neu o adref.
Mae gofyn iddyn nhw brofi eu bod nhw’n medru defnyddio’r cyswllt cartref a rhwydwaith y Brifysgol mewn da bryd, er mwyn sicrhau bod modd datrys unrhyw broblemau cyn y bydd gofyn iddyn nhw weithio o adref.
Er bod nifer o ddarlithwyr eisoes yn defnyddio’r cyswllt cartref ar gyfer marcio traethodau a derbyn e-byst, mae aelod o staff yn dweud wrth Golwg360 fod y sefyllfa’n dal yn aneglur, ac nad yw hi’n glir a fydd disgwyl i ddarlithwyr ac aelodau o staff gynnal darlithoedd a seminarau o gartref.
Does dim achosion o’r firws yn Aberystwyth, ond mae disgwyl iddo fod ar ei anterth erbyn mis Mai, pan fydd arholiadau semester 2 y brifysgol yn cael eu cynnal.
Mae’r Gweinidog Iechyd, Vaughan Gething yn disgwyl bydd mwy o achosion o’r feirws yng Nghymru dros y dyddiau nesaf.
Hyd yn hyn mae 6 achos wedi ei gadarnhau yng Nghymru.
Mae Golwg360 wedi gofyn i Brifysgol Aberystwyth ac Undeb Myfyrwyr Prifysgol Aberystwyth am ymateb.