Canu o’r drysau yn Nhal-y-bont

Wedi’u hysbrydoli gan yr Eidalwyr yn canu o’r balconïau, fe drefnodd trigolion un stryd fach yn Nhal-y-bont ffordd ddiogel o gyfarch eu cymydog gwych, Ieuan Morgan, ar ei ben blwydd arbennig heddiw.

Trwy drosglwyddo’r neges dros y ffôn, dros ffensys a chloddiau, llwyddwyd i drefnu bod rhyw 16 o bobl mas ar garreg y drws neu’n yr ardd yn barod i weld Ieuan yn ymddangos ar y dreif, yn sgil cael galwad ffôn gan un o’r cymdogion.

Roedd ei wyneb yn bictiwr wrth i’w gymdogion gymeradwyo a chanu pen blwydd hapus iddo.

Ffordd fach syml a diogel o gyfarch cymydog heb ei ail, ac arwydd o ysbryd gymdogol ardal Maes y Felin o’r pentref. Pan fydd yr hen feirws ’ma wedi gadael ein cymuned, fe gawn ni barti stryd mawr!