gan
Ohebydd Golwg360
Mae cronfa a sefydlwyd er cof am Anna Evans, oedd yn gweithio fel arlunydd llawrydd a gydag Amgueddfa Ceredigion, wedi agor ceisiadau i artistiaid celfyddydol lleol.
Bu farw Anna Roselyn Evans, 46, o Aberystwyth, mewn digwyddiad ar faes gwersylla ger Bethel, Caernarfon ym mis Awst llynedd.
Mae’r gronfa yn blaenoriaethu ariannu celfyddydau cymunedol i bobl o bob oed yng Ngheredigion.
“Parhau a’r gwaith a wnaeth Anna yn y gymuned”
“Dechreuon ni godi arian er cof am Anna y llynedd er mwyn caniatáu cyllid i artistiaid ac ymarferwyr celfyddydol lleol i barhau â’r gwaith a wnaeth Anna gyda’r gymuned,” meddai llefarydd ar ran y Gronfa.
“Fe wnaethon ni osod nod o £5000 i ddechrau ond cawson ein llethu pan wnaethon ni fwy na dyblu ein targed.”
“Dangosodd y gefnogaeth cawsom gan fusnesau ac unigolion lleol pa mor bwysig, nid yn unig oedd Anna, ond hefyd y gwaith yr oedd yn ei wneud.”
Agor y ceisiadau i gymunedau yng Ngheredigion
“Rydym bellach mewn sefyllfa i agor ceisiadau am Grant Gymunedol Gelfyddydol Anna Evans i unrhyw artistiaid ac ymarferwyr celfyddydol lleol sydd gyda phrosiectau mewn golwg rhwng Mai 2021 a Mawrth 2022, ac sy’n canolbwyntio ar ymgysylltu a chynnwys cymuned Ceredigion mewn unrhyw faes o’r celfyddydau.
“Mae swm o £5,000 ar gael ar gyfer yr ymgeisydd llwyddiannus.”
“Gwnewch y peth nesa’ sy’n ddiddorol” – Anna Evans