Seremoni Wobrwyo Dysgu Gydol Oes yn llwyddiant mawr!

Cynhaliodd Dysgu Gydol Oes Prifysgol Aberystwyth eu Seremoni Wobrwyo flynyddol ddydd Mawrth, 15fed Hydref yn Medrus Mawr, Penglais. Croesawodd Elin Mair Mabbutt, Pennaeth Dysgu Gydol Oes, bawb i’r seremoni a chyflwynodd y gwesteion arbennig, y Cynghorydd Wyn Thomas, Aelod Cabinet Cyngor Sir Ceredigion dros Ysgolion, Dysgu Gydol Oes a Sgiliau, a’r Cynghorydd Emlyn Jones, Dirprwy Faer Tref Aberystwyth. 

Arweiniwyd y Seremoni gan y Dirprwy Is-ganghellor Addysg a Phrofiad Myfyrwyr, yr Athro Anwen Jones. Cyflwynwyd eu tystysgrifau i dderbynwyr gan yr Is-ganghellor, yr Athro Jon Timmis, a siaradodd am ei bleser o weld y dysgwyr mor falch o’r hyn yr oeddent wedi’i gyflawni. 

Derbyniodd tua hanner cant o unigolion dystysgrifau cwrs, a chyflwynwyd Tystysgrif Addysg Uwch i dri myfyriwr: Borbala Reka Kiss a Dawn Parry-Cunliffe mewn Ecoleg Maes a Meryl Buchanan mewn Celf a Dylunio. 

Bob blwyddyn, rhoddir cyfle i ddysgwyr presennol enwebu cyd-fyfyriwr sydd wedi ysbrydoli eraill ar y cwrs ac eleni, aeth Gwobr Myfyriwr y Flwyddyn i Dr Helen Marshall. Cafodd Helen, sy’n ddarlithydd yn yr Adran Gwyddorau Bywyd yn y Brifysgol, ei henwebu gan ei chyd-fyfyrwyr ar y Cwrs Iaith Arwyddo Brydeinig. Cafodd ei chanmol am ei brwdfrydedd a’i hymdrech i greu diwylliant cynhwysol y tu allan i’r Dosbarth wythnosol. 

Dyfernir Gwobr Tiwtor y Flwyddyn i diwtor Dysgu Gydol Oes sydd, ym marn myfyrwyr, yn gwneud dysgu yn brofiad cyffrous ac ysbrydoledig ac sy’n dangos ymrwymiad a brwdfrydedd dros addysgu. Eleni, y derbynnydd oedd yr Athro Mererid Hopwood. Cafodd Mererid, y bardd ac awdur adnabyddus, ei henwebu gan sawl myfyriwr o gwrs ‘Gwibdaith Drwy Lenyddiaeth Gymraeg’ a’i chanmol am ei brwdfrydedd, ei ffordd hamddenol o gyfleu gwybodaeth ac am ei harddull gyffyrddus o addysgu. 

Llongyfarchiadau calonnog i bawb sydd wedi gweithio’r barhaol ar yr amrywiol gyrsiau a phob dymuniad da iddynt i’r dyfodol. 

Mae Dysgu Gydol Oes yn darparu cyrsiau rhan-amser sy’n agored i bawb. Ceir mwy o wybodaeth ar y wefan: aber.ac.uk/Dysgu