![Mwynhau ein cipolwg cyntaf o Gwm Rheidol](https://360.scdn8.secure.raxcdn.com/ased/sites/6/2022/09/Llun-Iestyn-1-640x396.jpg?8m)
![Prydferthwch Cwm Rheidol a'i argae](https://360.scdn8.secure.raxcdn.com/ased/sites/6/2022/09/Llun-Iestyn-2-142x88.jpg?a1)
![Gweld y tswff tswff ar ei ffordd i Aberystwyth](https://360.scdn8.secure.raxcdn.com/ased/sites/6/2022/09/Llun-Iestyn-3-142x88.jpg?b8)
![Gwyrddni Cwm Rheidol](https://360.scdn8.secure.raxcdn.com/ased/sites/6/2022/09/Llun-iestyn-4-142x88.jpg?cg)
![Am le i gael picnic](https://360.scdn8.secure.raxcdn.com/ased/sites/6/2022/09/Llun-iestyn-5-142x88.jpg?df)
![Cinio, llun a chlonc yng nghysgod Castell Bwa Drain](https://360.scdn8.secure.raxcdn.com/ased/sites/6/2022/09/Llun-iestyn-6-142x88.jpg?ei)
Ydych chi erioed wedi gweld yr olygfa ysblennydd o Gwm Rheidol o ardal Castell Bwa Drain? Wel, dyna wnaeth 27 o gerddwyr siaradus ar daith gerdded Ar Gered ddydd Sadwrn, Medi 24ain.
Man cychwyn y daith hon oedd Canolfan Ymwelwyr Bwlch Nantyrarian, ac yn hytrach na cherdded i gyfeiriad y goedwig neu’r llyn fel mae’r mwyafrif llethol o ymwelwyr yn ei wneud fe aethom i gyfeiriad y de h.y. yr ochr arall i’r ffordd fawr.
Gan groesi’r sticil (neu’r gamfa – beth ydych chi’n ei ddweud?) fe ddilynom y llwybr gweiriog heibio’r tyrbinau gwynt i gyfeiriad Cwmbrwyno gan fwynhau ambell seibiant i sylwi ar olion o’r oes fwyngloddio, gan gynnwys tipiau ac adfeilion digon clir bron 200 mlynedd ers i’r gweithfeydd cyntaf ddechrau yn y cwm.
Nesaf, fe wnaethom ddilyn cefnffyrdd a llwybrau hyfryd ar hyd Banc Hafodau a Banc Blaendyffryn cyn troi i gyfeiriad Cwm Rheidol. Roedd y llwybr ar hyd ochr y cwm heibio Gwar-llyn a’r Gelli ychydig yn serth, ond roedd y prydferthwch naturiol a’r golygfeydd o’r trên bach ar y top yn gwneud y cyfan yn fwy na gwerth yr ymdrech gorfforol.
Yn dilyn picnic yng nghysgod bryngaer Castell Bwa Drain, fe wnaethom ddilyn y ffordd fach gul ’nôl i gyfeiriad Cwmbrwyno a Bwlch Nantyrarian gan fwynhau disied yn y caffi.
Fe fydd y daith nesaf yn cael ei chynnal ym mis Hydref ac yn cael ei chyhoeddi yn fuan. Os hoffech dderbyn y manylion, e-bostiwch steffan.rees@ceredigion.gov.uk.
Diolch yn fawr i Iestyn Hughes am y lluniau