gan
Caryl Jones
‘Nabod Nant y Moch
Profiad gwych i’r disgyblion yn ddiweddar oedd cael creu panel comig hollol unigryw yn adrodd stori o’r ardal leol o dan arweiniad arbenigol Beth o gwmni CIPS Multimedia.
Yn dilyn prosiect podlediadau gyda’r criw Siarter Iaith yn y sir, ble fu’r plant yn dysgu mwy am hanes a phwrpas yr argae yn Nant y Moch, daeth y gwahoddiad i rannu’r wybodaeth yma ar ffurf panel cartŵn hwyliog.
Wrth baratoi ar gyfer y podlediad cynhaliwyd cyfweliadau gydag aelodau Statkraft, sydd heddiw yn berchen ar yr argae, gwyliwyd ffilmiau o’r cyfnod megis ‘Cwm Tawelwch’ ac astudiwyd hen luniau o’r cyfnod, a roddodd ddarlun cyflawn i’r plant o’r hyn ddigwyddodd.
Hawdd wedyn oedd rhannu’r stori i adrannau a darlunio lluniau, a dysgont fwy am bwysigrwydd pŵer hydro electrig wrth ddeall bod angen newid ein ffordd o ddefnyddio a llosgi ffynonellau egni.
Aeth grwpiau o blant ati i bortreadu’r stori yn eu ffyrdd unigryw eu hunain gan greu paneli lliwgar a deniadol. Wrth benderfynu ar y gwaith terfynol, penderfynodd pawb i ddewis un agwedd o bob panel fel bod gwaith pawb yn gallu cael ei gynnwys a’i arddangos.
Roedd hwn yn brosiect hollol newydd i’r plant a mwynhaont yn fawr wrth ddysgu am yr holl waith sydd yn mynd mewn i greu paneli comig o’r fath. Mae’r plant yn falch iawn o’r gwaith gorffenedig ac yn edrych ymlaen yn arw at weld y gwaith yn cael ei arddangos law yn llaw ag ysgolion eraill y sir yn Eisteddfod Ceredigion, 2022. Am ffordd wych o adrodd hanesion a storiâu pwysig ein Sir! Diolch i griw Siarter Iaith y Sir am y cyfle gwych yma i rannu traddodiadau a diwylliant ein hardal mewn ffordd hwylus a chŵl!