Dathlu yn y Tour de Suisse

Wythnos yn ôl cyhoeddwyd y byddai Stevie Williams yn rasio gyda Geraint Thomas, Owain Doull a Luke Rowe yn y ras ffordd yng Ngemau’r Gymanwlad ym Mirmingham eleni. Ond dydd Sul diwethaf, ac i gloriannu wythnos i’w chofio iddo, dyma Stevie yn ennill y cymal cyntaf y Tour de Suisse.

Roedd grŵp o 15 wedi torri’n glir ychydig cyn diwedd y cymal, ond wrth agosáu at y llinell derfyn dyma Stevie’n gwibio’n glir i hawlio’r fuddugoliaeth. Roedd y grŵp yn cynnwys enwogion fel Adam Yates, Jakob Fuglsang, Remco Evenepoel a neb llai na Geraint Thomas.

Felly ar yr ail ddiwrnod, roedd yn gwisgo’r crys melyn fel arweinydd y ras ac o ychydig o eiliadau roedd yn dal yn gwisgo’r crys melyn ar ddiwedd yr ail gymal! Pob hwyl am weddill y ras.