gan
Martin Davis
Ynghyd ag ennill taleb arddio am £80, adnoddau adnabod cacwn a phlac i’w osod yn y gerddi, mae enw gerddi Cletwr bellach yn hysbys ledled y DU ar gyfryngau cymdeithasol byd natur.
Yn ôl Siân Saunders, Tre Taliesin, un o griw brwd pleidwyr y peillwyr, “Ro’n i wir yn gorfod edrych ddwywaith pan ddaeth yr e-bost i roi gwybod i ni ein bod ni wedi ennill. Wrth ei agor, ro’n i jyst yn meddwl, ‘tybed pwy sy’ wedi ennill?’ ac wedyn yn sydyn yn sylweddoli fy mod i’n darllen am y Cletwr a ni oedd wedi curo!” Roedd y grŵp garddio ar ben ei ddigon gyda’r newyddion. “Mae’n braf gweld ymdrechion pawb yn dwyn ffrwyth fel hyn”, meddai Jane Nicholls, prif drefnydd y grŵp. Y gobaith yw y bydd pobl eraill yn cael eu hysbrydoli i blannu amrywiaeth o flodau yn eu gerddi i sicrhau porthiant i bryfed beillio yn ystod pob tymor.*
Fel y gwelwch chi o’r llun mae’r porthiant hydrefol i’r peillwyr yn drawiadol ac yn doreithiog a chydag ambell i breswylydd fel pe bai’n ystyried symud i fyw yn y gwesty pryfed yng ngardd gefn yr adeilad, mae pethau’n argoeli’n dda i beillwyr, planhigion a phobl y Cletwr fel ei gilydd.
*O ran diddordeb mae gan yr Ymddiriedolaeth dipyn o adnoddau yn y Gymraeg ac mae’n werth cael cip arnyn nhw fan hyn:
https://www.bumblebeeconservation.org/resources-in-welsh/?lang=cy