gan
Ohebydd Golwg360
Catrin Williams
Mae Catrin wedi bod yn gweithio ym Meithrinfa Camau Bach ers dwy flynedd bellach. Yn gyn-bennaeth ysgol gynradd, fe lwyddodd i ennill cymhwyster Lefel 3 Gofal, Dysgu a Datblygiad Plant trwy’r Mudiad Meithrin. Mae hi bellach yn astudio ar gyfer Lefel 5 trwy’r Mudiad.
Mae’r feithrinfa dydd yn darparu gofal ac addysg cyfrwng Cymraeg i fabis a phlant hyd at oed ysgol – ac fel rheolwr tîm staff y feithrinfa mae Catrin wedi gallu manteisio ar hyfforddiant Academi i’w thîm yn ogystal ag iddi hi ei hun hefyd. Academi sy’n gyfrifol am holl anghenion hyfforddiant Mudiad Meithrin i staff y Cylchoedd Meithrin a’r Meithrinfeydd Dydd, yn ogystal ag i staff cenedlaethol y Mudiad. Mae’n cynnig amrywiaeth o gyfleoedd datblygu i gymuned y Mudiad Meithrin ar hyd a lled Cymru.
Meddai Catrin: “’Dw i wedi cael cyfle i ddatblygu syniadau a sgiliau newydd trwy dderbyn hyfforddiant gan Mudiad Meithrin, ac mi fyddwn i’n annog unrhyw un i gymryd y cyfle i fynd ar gwrs neu sesiwn hyfforddi trwy Academi.”
Yn ôl Catrin, gweld y plant yn datblygu yw’r peth gorau am ei swydd. Mae’n mwynhau ei gwaith ac yn disgrifio ei rôl fel un “heriol, pleserus a gwerth chweil.”
__
Camau Bach – Mae camau bach yn un o dair meithrinfa ddydd Mudiad Meithrin. Mae’n darparu gofal i fabis a phlant hyd at oed ysgol, yn ogystal â chlwb cyn ac ar ôl yr ysgol. Cynllun Meithrinfeydd Dydd – Mudiad Meithrin
Academi – Hyfforddiant arbenigol sy’n rhad ac am ddim i bawb sy’n rhan o gymuned Mudiad Meithrin, o Gylchoedd Ti a Fi a Chylchoedd Meithrin i Feithrinfeydd Dydd ar hyd a lled Cymru. Darparu hyfforddiant i staff a gwirfoddolwyr Academi – Mudiad Meithrin