Rhedwyr Aber yn ailgychwyn

Michael Hall

Mae wedi bod yn flwyddyn heriol i bawb a phrin oedd y cyfleoedd i glybiau chwaraeon ddod at ei gilydd dros y deuddeg mis diwethaf. Ond wrth i’r niferoedd sydd wedi eu brechu gynyddu ac wrth i achosion o’r haint barhau i ostwng mae yna ychydig o oleuni ar ben draw’r twnnel ac mae clybiau chwaraeon yn awyddus i ailddechrau, er yn gwneud hynny’n bwyllog a gofalus.

Un o’r rhai yr effeithiwyd arnynt oedd Clwb Athletau Aberystwyth a oedd, cyn y pandemig, yn trefnu gweithgareddau bum noson yr wythnos ar gyfer pob oedran a phob gallu.

Yn ystod y cyfnod clo, bu hyfforddwyr yn brysur yn cynnig rhaglen barhaus o hyfforddiant rhithwir ond mae sesiynau grŵp ffurfiol i ddychwelyd y mis hwn fel yr esbonia’r cadeirydd Ian Evans:

Yn dilyn cyhoeddiadau diweddar Llywodraeth Cymru, rydym yn falch o ddweud y bydd ein sesiynau rhedeg yn ailgychwyn ym mis Mai. Yn naturiol, byddwn yn glynu wrth ganllawiau perthnasol gyda niferoedd cyfyngedig a bydd angen archebu lle ymlaen llaw, ond mae’n gam pwysig i’r cyfeiriad cywir.

Dros y flwyddyn ddiwethaf mae llawer wedi troi at ymarfer corff i’w helpu gydag iechyd corfforol a meddyliol ac mae Ian yn disgwyl cynnydd yn y diddordeb:

Yn ddiweddar rydym wedi cyhoeddi ein cyfleoedd aelodaeth ar gyfer y flwyddyn sydd i ddod, a thra bod hen aelodau’n awyddus i ddychwelyd i redeg fel grŵp rydym hefyd yn gweld aelodau newydd yn ymuno ar ôl dechrau rhedeg neu ddychwelyd at redeg dros y flwyddyn ddiwethaf.

Fel clwb cymunedol cyfeillgar, rydym yn croesawu hyn yn fawr iawn ac yn annog unrhyw un sy’n awyddus i redeg gydag eraill mewn criw cymdeithasol i gysylltu – byddai’n hyfryd eich gweld.

Mae rhai o’r rhedwyr eisoes yn gwneud eu marc wrth gynrychioli Aberystwyth mewn rasys a gynhaliwyd dros y ffin gyda Paul Williams ac Edward Land yn rhedeg marathon Shepperdine ac Owain Schiavone yn rhedeg marathon Elite Swydd Gaer.

Gorffennodd Ed Land mewn amser o 2:49:51 tra sicrhaodd Paul Williams ei amser gorau o 3.06.47. Yn ei farathon cyntaf, gorffennodd Owain Schiavone mewn amser gwych o 2:42:16.

Gobeithio bod gweld cynnal y rasys hyn yn arwydd o bethau gwell i ddod. Os hoffech glywed mwy am Glwb Athletau Aberystwyth ac ymuno yn ei weithgareddau ewch i aberystwythac.wordpress.com neu chwiliwch am y clwb ar Facebook.