gan
Ohebydd Golwg360
Elin Rattary – Llun CFfI Cymru
Mae Elin Rattray o Lanfihangel-y-creuddyn newydd gael ei phenodi’n Aelod Iau CFfI Cymru. Mae’n ddisgybl 6ed dosbarth Ysgol Penweddig, ac yn aelod o CFfI Trisant ers 5 mlynedd.
Pa mor bwysig yw Mudiad y Ffermwyr Ifanc i ti?
Mae’r mudiad wedi chwarae rôl holl bwysig yn fy mywyd i, ac rwyf wrth fy modd yn cwrdd â phobl newydd, yn dysgu sgiliau newydd a chael llu o brofiadau newydd o fewn y mudiad.
Mae’n fan gyfarfod, cyfle i gwrdd â phobl newydd o fewn yr ardal, yn Sirol ac yn Genedlaethol.
Mae’r mudiad yn dysgu sgiliau bywyd holl bwysig i ni fel pobl ifanc sydd yn ddefnyddiol mewn pob agwedd o fywyd.
Hoff gystadleuaeth/gweithgaredd CFfI?
Heb os nac oni bai, y Rali!
Dwi wrth fy modd efo diwrnod y Rali, cael y cyfle i gystadlu mewn amrywiaeth o gystadlaethau ynghyd a dal lan da hen ffrindiau, cwrdd â ffrindiau newydd a chymdeithasu efo pobl o ar draws y Sir a thu hwnt.
Pa wahaniaeth hoffet ti ei wneud fel Aelod Iau CFfI Cymru?
Dwi wir yn edrych ymlaen am fy mlwyddyn fel Aelod Iau Cymru. Dros y tair blynedd diwethaf dwi wedi bod yn Llysgennad CFfI yn Ysgol Penweddig. Yn dilyn llwyddiant y rôl yma rwy’n gobeithio ymestyn rôl y llysgennad i ysgolion uwchradd mewn siroedd eraill ynghyd ag ehangu’r Llysgenhadon i golegau yng Nghymru.
Beth yw’r her fwyaf i ti fel Aelod Iau CFfI Cymru?
Rôl bwysicaf Aelod Iau i mi yw sicrhau fy mod yn cynrychioli llais holl aelodau iau’r mudiad – dwi’n edrych ymlaen at yr her yma, i gyrraedd pob ardal o Gymru, i glywed eu syniadau a’i barn nhw am agweddau gwahanol o’r mudiad.
Yn ogystal â’r ffermwyr ifanc, sut wyt ti’n treulio dy amser?
Rwy’n hoff iawn o weithio yn y Siop Cigydd Teuluol yn Aberystwyth ac yn gyfrifol am dudalen ‘Instagram’ y busnes. Hefyd rwy’n cadw defaid Texel Glas ar y cyd efo fy mrawd ac yn eu harddangos nhw mewn sioeau lleol a’r Sioe Frenhinol.
Pa ymadrodd ti’n ei ddefnyddio’n rhy aml?
‘Fi’n Buzzin’
Pwy fyddet ti’n gwahodd i dy bryd bwyd delfrydol… a beth fyddai’r wledd?
Boris Johnson, er mwyn gweini cynhyrchion lleol Cymreig iddi – yn enwedig Cig Oen Cymreig. Byddai’n gyfle i ddangos iddo safon y bwyd rydym yn ei gynhyrchu yma yng Nghymru, a’r pwysigrwydd o gefnogi ffermwyr.
Pwy sydd wedi cael y dylanwad mwyaf arnat ti?
Ers yn blentyn bach, mae Mam wedi llusgo fi i holl ddigwyddiadau’r CFfI…..YM MHOB TYWYDD! Dyma be ysgogodd fi i ymuno a’r mudiad yn gyntaf pan oeddwn yn 12 mlwydd oed.